துருவத்தின் வழியாக வரும்.. துருவ நட்சத்திரத்தின் ஆற்றலைச் சுவாசிப்பதே… “துருவ தியானம்”

அகஸ்தியன் துருவத்தை நுகர்ந்து அறிந்தனால் துருவ நட்சத்திரமானான். இன்று நம் பூமிக்கு வருவதனைத்தையும் அகஸ்தியனும் அவன் மனைவியும் ஒளிச்சுடராக மாற்றி ஒளியின் சுடராக உருவாக்கிக் கொண்டே உள்ளார்கள்.

துருவ நட்சத்திரம் தன் இனப் பெருக்கத்தை ஒளிச் சுடராக மாற்றி இன்றும் நமது பூமியில் பரவிக் கொண்டுள்ளது. அந்தத் துருவப் பகுதியில் இருந்து வரும் அந்தச் சக்தியை நாம் பருகும் நிலைக்குத்தான் இந்த உபதேசமே.

அவர்கள் இருவரும் நஞ்சினை வென்று இந்த உடலிலேயே ஒளி அதாவது ஒளியாக மாற்றும் உணர்வுகள் பெற்றார்கள்.

இந்த வாழ்க்கையில் நம்மையறியாது எத்தனையோ விஷத்தன்மைகளை நுகர நேர்கின்றது. அதனால் விஷ அணுக்கள் நம் உடலுக்குள் உருவாகின்றது.

உருவான அந்த விஷமான அணுக்கள் இந்த மனிதனின் உடலைக் கரையச் செய்யும் அல்லது மாற்றி அமைக்கும். இதைப் போன்ற நிலைகளிலிருந்து நாம் தப்ப அந்தத் துருவ நட்சத்திரதிலிருந்து வரும் உணர்வுகளை நாம் நுகர்தல் வேண்டும்.

எப்படி வராகன் தீமைகளை வென்றிடும் உணர்வு பெற்று மனிதனாக உருவாக்கியதோ இதைப் போல மனிதனான பின்
1.தீமையை வென்றிடும் அந்த உணர்வின் எண்ணம் கொண்டு
2.நாம் அந்தத் தீமையை வென்றிட்ட அருள் மகரிஷியின் உணர்வை நாம் நுகரவேண்டும்.

துருவ மகரிஷியின் ஆற்றலை நாம் பெற்று விட்டால் நமக்குள் அதை உருவாக்கி நம் உடலிலே வளர்த்துக் கொண்டபின் இந்த உடலை விட்டு நாம் செல்லும்போது இந்தப் புவியின் பிடிப்பை அகற்றி விட்டு விண் செல்ல முடியும்.

அந்தத் துருவ நட்சத்திரத்தின் ஈர்ப்பு வட்டத்தில் சுழன்று கொண்டிருக்கும் ஏழாவது நிலைகள் கொண்ட சப்தரிஷி மண்டலத்துடன் சென்று நாம் ஐக்கியமாக முடியும்.

இன்று சூரியனின் காந்த சக்தி துருவ நட்சத்திரத்திலிருந்து வரும் உணர்வலைகளைக் கவர்ந்து துருவப் பகுதியின் வழியாக நம் பூமிக்குள் பரவச்செய்து கொண்டிருக்கின்றது.

நமது குருநாதர் ஈஸ்வரபட்டர் எந்தத் தருணத்தில் எனக்குள் (ஞானகுரு) அதை உபதேசித்து அந்த உணர்வைக் கவரும்படி செய்தாரோ அதைப் போல் உங்களுக்கும் ஏற்படுத்துகின்றோம்.

துருவ மகரிஷி துருவ நட்சத்திரமானபின் அதிலிருந்து வெளிப்படும் உணர்வை சூரியன் காந்த சக்தி கவர்ந்த அலைகளாக மாற்றி நம் பூமிக்கு வந்து கொண்டிருக்கும் அந்த அதிகாலை நேரத்தில் அந்த அருள் ஞானியின் உணர்வை உங்களுக்குள் அந்த உணர்ச்சியைத் தூண்டச்செய்கின்றோம்.

ஏனென்றால் நமது குருநாதர் இத்தருணத்தில் தியானிக்கும்படி எமக்குள் எப்படி உருவாக்கினாரோ அதே போன்று உங்களுக்குள்ளும் இது உருவாக்கப்பட்டு அந்தச் சக்திகளை நீங்களும் பெறுவதற்குத்தான் இந்தத் “துருவ தியானத்தை” அமைத்திருக்கிறோம்.

மூன்றாவது வகுப்பு படித்த என்னால் ஞானத்தைப் பெற முடிகிறது… உங்களால் பெற முடியாதா…? 

தையல் வேலை பார்ப்பவர்களும் சில வகையான பின்னல் ஆடைகளை நெய்பவர்களும் இருக்கின்றார்கள்.

நம்மிடம் பேசிக் கொண்டுதான் இருப்பார்கள். ஆனால் பழக்கப்படுத்தி வைத்திருப்பதால் அவர்கள் கைகள் தன்னாலேயே வேலை பார்த்துக் கொண்டிருக்கும்.

நேர்த்தியாகத் தைப்பார்கள், பின்னுவார்கள். அவர்கள் தைத்த ஆடைகள் சீராக இருக்கும். பின்னல் ஆடைகளும் நன்றாக இருக்கும்.

ஆனால் பழக்கமில்லாதவர்கள் பார்த்துப் பார்த்துத் தைத்தாலும் பின்னினாலும் நேராக வராது. கோணல் மாணலாகப் போய்க் கொண்டிருக்கும்.

மாமகரிஷி ஈஸ்வராய குருதேவர் காட்டிய அருள் வழியை நான் (ஞானகுரு) கடைப்பிடித்தேன். நான் படித்தது மூன்றாம் வகுப்புதான். அது கூட முழுமையாகப் படிக்கவில்லை.

குருநாதர் துருவ நட்சத்திரத்தின் உணர்வுகளை எனக்குள் பதிவாக்கினார். அவர் சொன்ன முறைப்படி அந்தத் துருவ நட்சத்திரத்தின் பேரருள் பேரொளியை எனக்குள் வளர்த்துக் கொண்டேன்.

எப்படிப்பட்ட தீமைகள் வந்தாலும் அதை மாற்றி அமைக்க முடிகின்றது. எளிதில் தீமைகளை அகற்றும் நிலைகளைப் பெற்றேன். ஆகவே

1.எனக்குள் தீமைகள் புகாது தடுத்துக் கொள்வதும்

2.உங்களுக்குள் தீமைகள் புகாது தடுக்கும் சக்தியாக அந்த அருள் உணர்வுகளை ஊட்டுவதும் என்னால் முடிகின்றது.

நீங்களும் பழகிக் கொண்டால் நிச்சயம் உங்களால் முடியும்.

உங்கள் வாழ்க்கையில் பல தீமைகள் வந்தாலும் தீமைகளைப் பற்றித் தெரிந்து கொண்டாலும் அவர்களுக்கு உதவி செய்தாலும் அந்தத் தீமை என்ற உணர்வுகள் உங்களுக்குள் வளராது தடுக்கும் “உபாயத்தைத்தான்..,” கொடுக்கின்றோம்.

இதை நீங்கள் பதிவாக்கிக் கொண்டால் இந்த உணர்வின் தன்மை உங்களுக்குள் செயலாக்குகின்றது.

இன்று ஒரு கம்ப்யூட்டர் மூலம் ஒரு இயந்திர மனிதனை உருவாக்குகின்றார்கள். இயந்திர மனிதனை உருவாக்கியபின் அதை வைத்துப் பல வகையான வேலைகளைச் செய்ய வைக்கின்றார்கள்.

உதாரணமாக இங்கே குப்பைகள் விழுந்துவிட்டால் அதைக் கண்டபின்.., “எலெக்ட்ரானிக் ஆகி” உடனே அந்தக் குப்பையை உறிஞ்சி எடுத்துக் கொள்கின்றது.

குப்பை இல்லை என்றால் பேசாமல் போய்விடுகின்றது.

அதே சமயத்தில் “தனக்கு ஆகாதவன் வருகிறான்..,” என்றால் பணப் பெட்டியையோ மற்றதையோ திருடும் நோக்கத்துடன் வருகின்றான் என்றால் “அது எலெக்ட்ரானிக் ஆக மாற்றி” எதிரி வருகின்றான் இதை உடைக்கப் போகின்றான் என்று “அறிவிப்பு” கொடுக்கின்றது.

ஏனென்றால், மனிதனால் செய்யப்பட்ட இயந்திரம் எலெக்ட்ரானிக் மூலம் இத்தகையை உணர்வுகளைச் செயல்படுத்துகின்றது. இதை போன்று தான்

1.உங்கள் உயிர் “எலெக்ட்ரிக்”.

2.நுகரும் உணர்வுகள் “எலெக்ட்ரானிக்” (உணர்ச்சிகளாக மாற்றுகின்றது உயிர்)

இருளை நீக்கி ஒளியான உணர்வாக மாற்றிக் கொண்டவர்கள் மகரிஷிகள். அப்படிப்பட்ட உயர்ந்த அழுத்தத்தைக் கொண்ட மகரிஷிகளின் அருள் உணர்வுகளை உங்களுக்குள் பதிவாக்குகின்றோம்.

அப்பொழுது உங்கள் நினைவினைச் சிறிது கூட்டினால் (எலெக்ட்ரானிக் அழுத்தத்தைக் கூட்டி) மகரிஷிகளின் உணர்வின் அழுத்தம் பிறருடைய பகைமை உணர்வுகளை உங்களுக்குள் வராதபடி தடுத்துக் கொள்ள முடியும்.

அந்தச் சக்தி நீங்கள் பெறவேண்டும்.

உங்களை இயக்குவது உயிர் ஈசன். நுகர்ந்த உணர்வின் தன்மை உருவாக்குவது ஈசன்.

உருவாக்குவது ஈசன் என்று தெரிந்து கொண்ட பின் வேதனையான உணர்வுகள் உயிரிலே பட்டால் நாம் எதைச் சேர்த்தோமோ அதன் வழியில் தான் அழைத்துச் செல்லும்.

ஆனால், அந்தத் தீமைகளை நீக்க வேண்டும் என்று எண்ணினால் அதன் வழியில் நம்மை அழைத்துச் செல்லும்.

எனக்கு குருநாதர் இந்த உணர்வின் அழுத்தத்தை எப்படிக் கொடுத்தாரோ அதே போலத்தான் உங்களுக்கும் அந்த ஆற்றலைக் கொடுக்கின்றோம்.

குருநாதர் ஏகாந்த நிலைகள் கொண்டு இன்று சப்தரிஷி மண்டலத்தின் அங்கமாக வாழ்ந்து கொண்டுள்ளார். அவர் பெற்றதை உங்களுக்குள் பதிவாக்கப்படும் பொழுது அவர்கள் பெற்ற அனைத்தையும் நீங்கள் எளிதில் பெற முடியும்.

உங்களை நீங்கள் நம்ப வேண்டும்.

நம் உடலில் வரும் நோய்களை விஞ்ஞான அறிவுப்படி சில மருந்துகளைக் கொடுத்துத் தடுத்து நிறுத்துகின்றோம். ஆனால், நோய் உருவாவதற்குக் காரணமான நிலைகளை முழுமையாக மாற்ற முடியவில்லை.

காரணம் என்ன…?

நாம் உற்றுப் பார்க்கும் உணர்வுகளைக் கண்ணில் உள்ள கருவிழி “ஊழ்வினை” என்ற வித்தாக நம் விலா எலும்புகளில் பதிவாக்கிவிடுகின்றது.

ஊழ்வினை என்றால் இயக்கம்.

உதாரணமாக நமக்கு வேண்டியவர் ஒருவர் வேதனைப்படுகிறார் என்றால் அவரை உற்றுப் பார்க்கின்றோம். அப்பொழுது நாம் நுகர்ந்த உணர்வுகள் கருவிழியால் பதிவாக்கப்பட்டு ஊழ்வினை என்ற வித்தாகப் பதிவாகி விடுகின்றது.

அப்பொழுது அவருக்கு உதவி செய்ய வேண்டும் என்று எண்ணுகின்றோம். அதன் உணர்வுப்படி இயக்கி அவருக்கு உதவியும் செய்கின்றோம்.

ஆனால் அவர் உடலில் விளைந்த வித்தை நமக்குள் பதிவாக்கிய பின் அது என்ன செய்யும்?

அது வலிமையான வித்தாக இருக்கும் பொழுது அவர்கள் பட்ட வேதனையைக் கவர்ந்து அவர்கள் உடலில் நோய்கள் உருவாக்கியது போல நம் உடலிலும் வேதனையை உருவாக்கும் அணுக்கள் பெருகிவிடுகின்றது.

அத்தகையை அணுக்கள் பெருகியபின் நமக்கும் உடல் நலக் குறைவாகின்றது. அப்பொழுது மருந்து கொடுத்து நோயைத் தடுத்துக் கொள்கின்றோம்.

இருந்தாலும் கருவிழியால் கவரப்பட்டு விலா எலும்புகளில் பதிவான ஊழ்வினை என்ற வித்தை அழிக்க முடியாது. நம் உடலில் மானிட்டர் போன்று குருத்தெலும்பு இருக்கின்றது.

நாம் வேதனைப்பட்ட உணர்வை விலா எலும்புகளில் பதிவாக்கும் பொழுது அது இழுக்கும். அப்பொழுது அந்த நேரத்தில் பார்த்தோம் என்றால் “பட…பட…பட…பட..,” என்று துடிக்கும்.

1.ஒரு அதிகமான சந்தோஷம் ஆனாலும் படபடப்பு வரும்.
2.பயமானாலும் அந்த உணர்ச்சிகள் வரும்.
3.எதை ஆசைப்படுகின்றோமோ அது கிடைக்கும் என்று இருந்தால் அந்தப் படபடப்பு வரும்.

இன்றைக்கு தரித்திரமாக இருக்கின்றது என்று வைத்துக் கொள்ளுங்கள். “ஒரு இலட்ச ரூபாய்” பரிசு விழுந்தது.., என்று கேள்விப்பட்டால் உங்கள் இருதயத் துடிப்பைப் பார்க்கலாம்.

அந்த ஆசையில் வேகமாக வருகின்றது. அப்பொழுது உங்கள் மனதைக் கட்டுப்படுத்த முடியவில்லை.

இதுவெல்லாம் அந்தந்த நிகழ்ச்சிகளைச் சொன்ன உணர்வைப் பதிவாக்கியபின் அதன் உணர்வைக் கவர்ந்தாலும் உயிருக்குள் பட்டவுடன் சிலருக்கு மயக்கமே வந்துவிடும்.

“இல்லாதவர்களுக்குத் திடீரென்று…, பணம் கிடைக்கின்றது” என்று வந்தபின் அதைத் தாங்கும் இயல்பற்று அந்த இருதயங்களுடைய “நரம்பு மண்டலங்கள்.., சிதைந்து விடுகின்றது”. அல்லது
1.அந்த உணர்ச்சிவசப்பட்டு வேகத் துடிப்பாக எடுக்கும் பொழுது
2.இருதயத்தை இயக்கும் சிறு மூளை பாகங்கள் இதனுடைய அழுத்தம் அதிகமான பின்
3.கடத்திச் செல்லும் நரம்பு மண்டலம் ஒரு சைக்கிள் ட்யூபில் கொஞ்சம் பலவீனமானால் ஒரு பலூன் மாதிரி உப்பி எப்படி வெடித்துவிடுகின்றதோ
4.இதைப் போல் சிறு மூளையில் உள்ள நரம்பு மண்டலங்களில் அது வெடித்துவிடும்.
5.பிறகு வைத்தியமே இல்லை. மரணம் தான்.

இதை போன்று ஆசையின் அளவுகள் பெறும் பொழுதும்.., நமக்குள் வேதனை என்ற உணர்வு வரும் பொழுதும் இந்த மாதிரி ஆகிவிடுகின்றது.

இதையெல்லாம் நீங்கள் தெரிந்து கொள்ள வேண்டும். ஏனென்றால் நாம் யாரும் தவறு செய்யவில்லை.

பண்பும் பரிவும் ஈகையும் கொண்டு பிறருடைய துயரங்களை நாம் கேட்டுணர்ந்து அவர்களுக்கு நாம் உதவி செய்தாலும்1.அவர்களுடைய வலிமையான உணர்வுகள் நம் உடலுக்குள் ஊடுருவி2.நம் நல்ல குணங்களைச் செயலற்றதாக மாற்றிக் கொண்டேயுள்ளது.

நீங்கள் எத்தகையை வைத்தியத்தைச் செய்து உடல் நோயை மாற்றினாலும் பின் இதன் நிலைகளில் நாம் ஊழ்வினை என்ற வித்தை அந்த ஆணிவேரை நாம் மாற்ற முடியாது.

ஊழ்வினை என்ற அந்த வித்தை மாற்றுவதற்குத்தான் உங்களுக்குள் மீண்டும் மீண்டும் அந்தத் துருவ நட்சத்திரத்தின் உணர்வை ஆழமாகப் பதிவாக்கிக் கொண்டுள்ளோம்.

துருவ நட்சத்திரத்தை எண்ணி ஏங்கி அதிலிருந்து வெளிப்படும் பேரருள் பேரொளியைப் பெறவேண்டும் என்று திரும்பத் திரும்ப நீங்கள் எண்ணினால் உங்கள் விலா எலும்புகளுக்குள் ஊழ்வினை என்ற வித்தாகப் பதிவாகின்றது.

அதனின் வலிமையை நாம் கூட்டிக் கொண்டே வந்தால் அந்த வலிமையால் நமக்குள் முந்திய நிலைகள் இருப்பினும் இப்பொழுது சேர்க்கும் துருவ நட்சத்திரத்தின் உணர்வுகள் அதை மாற்றி அமைக்கும் சக்தியாக அதற்கு அருகிலேயே (ஏற்கனவே பதிவான வித்திற்கு) உருவாகும்.

1.துருவ நட்சத்திரத்தின் கணக்குகள் கூடக் கூட ஏற்கனவே உள்ள தீமையின் நிலைகள் சிறுத்துவிடுகின்றது.
2.தீமைகளின் வலிமையைக் குறைத்து நன்மை செய்யும் கணக்காக மாற்றிக் கொள்கின்றோம்.
3.அதாவது தீமை செய்யும் வித்துக்களை நன்மை செய்யக்கூடிய வித்துக்களாக மாற்றுகின்றோம்.

உதாரணமாக குழம்பு வைக்கின்றோம் என்றால் மிளகாய் தனித்துக் காரமாக இருக்கின்றது, அதைப் போன்ற மற்ற பொருள்களும் அதனதன் சுவைகளைக் கொடுக்கின்றது. நாம் தெரிந்து கொள்கின்றோம்.

எல்லாவற்றையும் சமப்படுத்தி அதன் உணர்வுகளைச் சுவையாக மாற்றிக் கொள்கின்றோம்.

வேதனைப்படுகின்றான் கோபப்படுகின்றான் கொதிப்படைகின்றான் சொன்னபடி கேட்க மாட்டேன் என்கிறான் ஏமாற்றுகின்றான் என்ற உணர்வுகளை எடுத்துக் கொண்டால் நமக்குள் பதிவாகி அதனின் உணர்வின் இயக்கமாக நம்மை மாற்றுகின்றது.

அதை எல்லாம் நாம் மாற்ற வேண்டும். துருவ நட்சத்திரத்தின் உணர்வுகளைக் கலந்து அவைகளை மாற்ற முடியும். அதைச் சுவையாக மாற்றிக் கொள்ள முடியும்.

உங்களால் முடியும், உங்களை நீங்கள் நம்புங்கள்.

சாப அலைகள்… பழி தீர்க்கும் உணர்வுகள் வந்து குடும்பங்கள் எப்படி நசுங்குகிறது…? – நடந்த நிகழ்ச்சி

குருநாதர் இந்த உலகில் மூன்று இலட்சம் பேரைச் சந்திக்கச் செய்து எமக்கு (ஞானகுரு) நேரடியாகப் பல உண்மைகளைக் காட்டுகின்றார்.

ஒவ்வொரு மனிதனும் தவறு செய்யாமலேயே அவரவர் சந்தர்ப்பம் வாழ்க்கையில் வந்த நிலைகள் எவ்வாறு ஊடுருவி அந்தக் குடும்பங்களில் சேர்கின்றது?

ஒற்றுமையாக வாழ்ந்த நிலைகள் எனக்குப் பங்கு குறை, உனக்குப் பங்கு குறை என்று வரும் பொழுது “சாப அலைகள்” எப்படி வருகின்றது?

தொழில் செய்யும் பொழுது பாசததால் தவறு செய்துவிட்டால் அந்தத் தவறால் “பழி தீர்க்கும் உணர்வுகள்” எப்படி வருகின்றது?

வந்தபின் அந்த உணர்வுகள் அவர்களுக்குள் விளைந்து அதனால் அந்தக் குடும்பங்கள் எப்படி நசுங்குகின்றது?

அதே சமயத்தில் தன் உணர்வால் அன்னை த்ந்தை சம்பாதித்து வைத்திருந்தாலும், கடைசியில் சொத்து வரவேண்டும் என்று அண்ணன் தம்பிக்குள் சண்டை போட்டு தாய் தந்தையை அனாதையாக விட்டுவிட்டு அவருடைய சாபங்கள் என்னென்ன வேலை செய்கிறது?

இதையெல்லாம் மூன்று இலட்சம் பேரின் உணர்வுகளைக் காட்டுகின்றார். அப்படி உலகம் முழுவதற்கும் எமக்குள் காட்டிய நிலைகளைத்தான் அனைத்தையுமே உங்களிடம் வெளிப்படுத்துகின்றேன்.

அதில் முதல் மனிதனாகக் காட்டியது என்னுடைய உறவினர் ஒருவர். அவர் ஒரு தரகர். ரேஷன் கடை காண்ட்ராக்ட் எடுத்து நல்ல முறையில் நடத்தினார்.

பழனியில் இருந்தவர்களுக்கெல்லாம் அவரைப் பற்றித் தெரியும்.

பழனி முருகனுக்கு அபிஷேகம் செய்வது விழாக் காலங்களில் மார்கழி போன்ற மாதங்களில் 1000, 2000 பேர்களுக்குச் சாப்பாடு போட்டு ஏராளமான தர்மங்களைச் செய்தவர்.

ஒரு முறை பழனி மலை மேலே ஏறும் பொழுது, அங்கே விநாயகர் கோவிலுக்கு அருகில் போனவுடன்.., அப்படியே “கை கால் வராமல்” கீழே விழுந்துவிட்டார்.

ஆக, கை கால் வேலை செய்யவில்லை, வாயும் பேச வரவில்லை.

இவர்கள் எல்லாம் கூட்டத்தோடு போனதால் மேலே போகாமல் இவரைத் தூக்கிக்கொண்டு கீழே வந்து டாக்டரிடம் கொண்டு செல்கிறார்கள்.

பார்த்தால் “பிரஷர் அதிகமாகிவிட்டது..,” என்று சொல்கிறார்கள். பல டாக்டர்களிடம் பார்க்கிறார்கள். ஒரு மாதம் ஆகிவிட்டது. பின் இரண்டு மாதம் ஆகிவிட்டது. “சரியாகவில்லை”.

அவர் மலைக்குப் போன நிலையும் வந்த நிலையும் குருநாதர் நடந்த இந்த நிலைகளை எம்மிடம் காட்டுகின்றார். இதைக் காட்டிவிட்டு “அவரைப் போய்ப் பார்..,” என்றார்.

அங்கே சென்றால்.., “எதற்காக வந்திருக்கிறீர்கள்…?” என்று உள்ளே விடவில்லை.

இந்த மாதிரி நல்லையா மருமகன் வந்திருக்கின்றேன்.., “அவரைப் பார்க்க வேண்டும்”. இந்த மருந்தைக் கொடுத்தால் அவர் உடல்நிலை சரியாகும்.., “எழுந்து நடப்பார்” என்று அங்கே சொல்கிறேன்.

பார்த்தால் உள்ளேயிருந்து அவருடைய சப்தம் கேட்கிறது. அவரால் முடியவில்லை. தண்ணீர் வேண்டும்.., சாப்பாடு வேண்டும்.., அது வேண்டும்.., என்று சப்தம் போடுகிறார்.

“சனியன்…,” தொலைந்து போ…! சும்மா…, சப்தம் போடுகிறாய்…! “பேசாமல் கிட..,” யாரிடமாவது பேசிக் கொண்டிருந்தாலும் இந்த மாதிரிப் பண்ணுகிறார் என்று இவர்கள் குய்யோ முறையோ என்று அழுகிறார்கள்.

அவருடைய பையன் என்ன செய்கிறான்? “உன்னை.., இரண்டு சாத்து (அடி) சாத்தினால்தான்.., சரியாக இருக்கும்” என்கிறான்.

எவ்வளவோ பணம் சம்பாரித்து வைத்துள்ளார்கள். ஆனால் “அடித்தால்தான் சரியாகும்” என்று அவர் பையன் சொல்கிறான்.

என்னிடம் பையன் வந்து…, “ஐயா! இந்தச் சனியனுக்கு எதைப் பண்ணினாலும் மறந்து போகும். நீங்கள் பேசாமல் போங்கள். நீங்கள் வந்ததற்கு.., நன்றி” என்று சொல்லி “என்னைப் பார்க்கவிடாமல்” செய்தார்கள்.

குருநாதர் முதலிலேயே என்னிடம்.., “இப்படித்தான் நடக்கும்.., என்று சொல்லித்தான் நீ அதைப் போய்ப் பார்..,” என்றார்.

அவர்களிடம் நான் என்ன சொல்லியும் கேட்கவில்லை.

கடைசியில் அவர் சாகப் போகும்போது என்னென்ன எண்ணினாரோ “அந்தக் குடும்பத்தில் அனைத்தும் சிக்கலாகி” மில் என்ன ஆகியது? பையன்கள் என்ன ஆனார்கள்? எல்லாம் போய்விட்டது.

குருநாதர் இதையெல்லாம் தெளிவாகக் காட்டுகின்றார். இது நடந்த நிகழ்ச்சி.

இதைப் போல, பம்பாய்க்கு நான் கால் நடையாக நடந்து போனேன். குருநாதர் போகச் சொல்லியிருந்த இடங்களில் நான் போய்ப் பார்க்கிறேன். பார்க்கப்படும்போது அவர்கள் எந்தெந்த நிலையில் இருக்கிறார்கள்?

அப்பொழுது இவர்களைப் படம் எடுத்த மாதிரிக் காட்டுகிறார் குருநாதர். அதற்கப்புறம் அங்கே போகிறேன்.

அங்கே போய் உட்கார்ந்து இரவெல்லாம் அவர்கள் என்னென்ன செய்கிறார்கள்? அவர்கள் குடும்பம் எப்படி? அந்தக் குடும்பத்தில் எப்படியெல்லாம் என்று பார்க்கச் சொன்னார் குருநாதர்.

இதைப் பார்க்கச் சொன்னதோடு மட்டுமல்ல. “அவர்கள் கஷ்ட நஷ்டங்களை.., நீ எண்ணியவுடனே.., உனக்குள் அந்தக் கஷ்டம் வருகின்றது”.

என்னென்ன தொல்லை வருகிறதோ அவர்கள் படுகிற வேதனை எல்லாம் உனக்குள் மனக்கலக்கம் இதெல்லாம் எப்படி வருகின்றது? என்று காட்டுகிறார்.

நீ எண்ணிப் பார்க்கும் பொழுது..,
1.“உனக்குள் எப்படி அந்தத் தீமைகள் வருகிறது?”
2.இந்த உடலுக்குள் இந்த உணர்வுகள் எப்படி இயங்குகின்றது? என்று இதையும் காட்டுகின்றார்.

சாதாரணமாக, மனிதர் நல்லவர்களாக இருப்பார்கள். மற்றவர்கள் கஷ்டப்படுவதைக் கேட்டுக்கொண்டிருந்த உடனே கேட்டுக் கொண்டிருந்த உணர்வுகள் நல்லவர் உடலிலே எப்படிச் சேருகின்றது?

இதை அறிந்து கொள்வதற்கு நீ போகிறாய். அவருடைய துயரங்கள் எல்லாம் உனக்குள் வந்த உடனே “எந்த வேதனையாக மாறுகிறது” என்று தெளிவாகக் காட்டினார் குருநாதர்.

இதையெல்லாம் நாம் தெளிவாகத் தெரிந்து கொள்ள வேண்டும்.

ஆகவே, தவறு செய்யாமலே தீமைகள் எப்படி வருகின்றது? இதிலிருந்து நம்மை மீட்டிக் கொள்ளும் சக்தியாகத்தான் அந்தத் துருவ நட்சத்திரத்தைக் காட்டினார் குருநாதர்.

துருவ நட்சத்திரத்தின் பேரருள் பேரொளியை நாம் நுகர்ந்து நமக்குள் அறியாது சேரும் தீய வினைகளையும் சாப அலைகளையும் நாம் நீக்கிப் பழக வேண்டும்.

துருவ நட்சத்திரத்தின் உணர்வுகளை நாம் பற்றுடன் பற்றி இந்த வாழ்க்கையில் வரும் தீமைகளைப் பற்றற்றதாக மாற்றிக் கொண்டே இருக்க வேண்டும்.

அதே போல துருவ நட்சத்திரத்தின் பேரருள் பேரொளி உணர்வுகள் எல்லோரும் பெறவேண்டும் என்று எண்ணினால் அவர்கள் உணர்வுகள் நம்மை இயக்காது நம்மை நாம் காத்துக் கொள்ளலாம்.