“பிடிக்காதவர்கள்… எப்படா இறப்பார்கள்” என்று நினைக்கலாமா…! 

குருநாதர் இட்ட கட்டளைப்படி யாம் திருத்தணியில் மலைக்குச் செல்லும் பொழுது ஒருவர் எம்மைச் சந்தித்தார்.

நான் ஒரு விவசாயி, இங்கிருந்து பத்தாவது மைலில் எங்கள் கிராமம் இருக்கிறது. என் மனைவிக்கு ஒன்றரை வருட காலமாக எழுந்து உட்காரவோ நடக்கவோ முடியவில்லை.

என்ன நோய் என்று தெரியவில்லை? எந்த வைத்தியத்திற்கும் கட்டுப்படவில்லை. என்ன செய்வது என்றும் தெரியவில்லை என்று கூறினார்.

சாமி.., நீங்கள் எங்கள் ஊருக்கு வந்து “என் மனைவியின் நோயைப் போக்கி நடக்க வைக்க வேண்டும்” என்று கண்களில் நீர் ததும்ப எம்மை ஊருக்குக் கூப்பிட்டார்.

யாம் இங்கு தியானத்திலிருந்துவிட்டு அதன் பிறகுதான் எங்கும் வர முடியும் என்றோம்.

தாங்கள் எப்படிச் சொல்கிறீர்களோ அதுவரைக்கும் இங்கேயே இருந்து தங்களை அழைத்துக் கொண்டு போகிறோம் என்றார் அவர்.

விவசாயியைக் கூட்டிக்கொண்டு திருத்தணி மலைமீது ஏறிச் சென்றேன். குருதேவர் கூறிய இடத்தை அடைந்தவுடன் அவரை நான்கு நாள் கழித்து வரும்படிச் சொல்லிவிட்டு குருதேவர் குறிப்பிட்ட இடத்தில் தியானத்தில் அமர்ந்து கொண்டேன்.

யாம் இங்கிருக்கிறோம் என்று ஊரில் யாரிடமும் தெரியப்படுத்தக்கூடாது என்று சொல்லி அனுப்பிவிட்டோம்.

யாம் தியானத்தில் இருந்த 4 நாள்களிலும், பல நிலைகள் காட்சிகளாகத் தெரிந்து கொண்டிருந்தன. யாம் காட்சிகளாகப் பார்த்த பல நிலைகளுக்கும், குருதேவர் விளக்கி உபதேசித்து அருளிவிட்டு நாளை வரும் விவசாயியின் ஊருக்குச் செல்லும்படிக் கூறிவிட்டு மறைந்து விட்டார்.

நான்காம் நாள் யாம் இருக்கும் இடத்திற்கு விவசாயி வந்து என்னை அவர் வீட்டிற்கு அழைத்துச் சென்றார்.

விவசாயின் மனைவி வாத நோயால் கை கால் பாதிக்கப்பட்டு படுத்த படுக்கையாக இருந்தார்.

அன்று இரவு தியானத்தில் அமர்ந்தேன். அது சமயம் காட்சியாக விவசாயியின் “தாயார்..,” வாத நோயுடன் கை கால் வராமல் படுக்கையிலிருந்து கொண்டு வேதனையுடன் பல முறை மருமகளைக் (விவசாயின் “மனைவியை”) கூப்பிட்டார்கள்.

அப்பொழுது மருமகள்.., “சனியன் தொலைய மாட்டேனென்கிறதே”, என்று முனங்கிக் கொண்டே மாமியாரைப் பார்க்க அருகில் வந்தார்.

“ஒரு பக்கமாக எனக்குக் கைகால்கள் வலிக்கின்றது, என்னை அந்தப் பக்கம் கொஞ்சம் புரட்டிவிடு” என்றார்கள்.

மருமகளோ “நீ செத்தால்தான்… எனக்கு விடிவு காலம் வரும்” என்று சொல்லிக் கொண்டே வேண்டா வெறுப்புடன் மாமியாரை ஒரு பக்கமாகப் புரட்டிவிட்டார்.

இதைக் கண்டு மாமியார் வேதனையுடன் இப்படியெல்லாம் ஏசுகிறாயே.., “முருகா…!” என்று சொல்லி வேதனையுடன் பெருமூச்சு விட்டார்கள்.

மருமகளுக்குக் கோபம் வந்து என்ன…! இப்படியெல்லாம் பேசுகிறாய்…! என்று ஏச மாமியாரும் வேதனையுடன் பேசினார்கள்.

1.மருமகள் கோபத்துடன் ஏசிய உணர்வலைகள்
2.மாமியாரின் இரத்தத்தில் கலப்பது காட்சியாகத் தெரிந்தது.
3.இதைப் போன்று மாமியார் சாபமிட்டு ஏசிய உணர்வலைகள் மருமகளின் உணர்வுகளில் உந்தப்பட்டு
4.மருமகளின் இரத்தத்தில் கலப்பதும் காட்சியாகத் தெரிந்தது.

மேற்கூறியவாறு ஒருவருக்கொருவர் பல மாதங்களாக நினைத்தும் ஏசியும் பேசிக் கொண்ட உணர்வலைகள் ஒருவருக்கொருவர் படர்கின்றது.

அதாவது
1.மருமகள் மாமியாரை நினைத்து ஏசிய உணர்வலைகள்
2.மாமியாரின் உடலில் வினைகளாக விளைகின்றன.
3.மாமியார் மருமகளை நினைத்துச் சாபமிட்டுப் பேசிய உணர்வலைகள்
4.மருமகளின் உடலில் வினைகளாக விளைகின்றன.

வேதனை உணர்வுடன் “மருமகளை எண்ணியவாறே…” மாமியாரின் உயிராத்மா உடலைவிட்டுப் பிரிந்து சென்றது.

1.சில நாட்களில் மருமகளின் உடலில் மாமியாரின் உயிராத்மா இயங்கத் தொடங்கி
2.மாமியார் எந்த நோயால் வேதனைப்பட்டுக் கொண்டிருந்தார்களோ,
3.அதே வேதனையை மருமகள் அனுபவித்துக் கொண்டிருக்கும் நிலைகள்
4.இவை எனக்குக் காட்சியாகத் தெரிந்து கொண்டிருந்தது.

அது சமயம் குருதேவர் காட்சி கொடுத்து இதற்கு நீ என்ன செய்யப் போகிறாய்? என்று கேட்டுவிட்டு அதற்குச் சில வழிமுறைகளை உணர்த்தி உபதேசித்தார்கள். பிறகு தியானத்தைக் கலைத்துவிட்டேன்.

விவசாயின் மனைவியிடம் நீங்களும் உங்கள் மாமியாரும் அடிக்கடிக் கோபித்துக் கொள்வீர்களா? என்று கேட்டேன்.

“ஆம்..,” என்று ஒப்புக் கொண்டார்கள்.

யாம் சொல்கிறபடி செய்தால் நோய் தீரும் என்றேன்.

தாங்கள் எப்படிச் செய்யச் சொல்கின்றீர்களோ அதன்படி நாங்கள் செய்கிறோம் என்றார்கள்.

விவசாயின் குடும்பத்தில் உள்ள அனைவரையும் தியானத்தில் அமரச் செய்தேன்.

தியானமிருந்து கண்களைத் திறந்தவுடன்
1.விவசாயின் தாயாரின் பெயரைச் சொல்லி
2.அவர் உயிராத்மா மகரிஷிகளின் அருள் ஒளியால் புனிதம் பெற வேண்டும் என்று
3.குடும்பத்தில் உள்ள அனைவரையும் குருதேவர் உணர்த்திய வழியில், சொல்ல வைத்தோம்.

இவ்வாறு பத்து நாள்கள் தியானமிருந்து சொல்ல வைத்ததனால், விவசாயின் மனைவி 10 நாள்களில் மெள்ள மெள்ள எழுந்து நடக்கலானார்.

விவசாயின் குடும்பத்தில் அனைவரும் மட்டில்லா மகிழ்ச்சி அடைந்தார்கள். விவசாயின் மனைவி இனி நான் “யாரையும் மனம் நோகும்படிப் பேச மாட்டேன்…” என்று வேண்டிக் கொண்டார்.

தொடர்ந்து நீங்கள் தியானம் செய்தால் உங்களை அறியாது வரும், கோபம் குரோதம் பயம் நீங்கி உங்கள் குடும்பத்தில் நலமும் வளமும் பெற்று வாழ்வீர்கள் என்று யாம் ஆசீர்வதித்தோம்.

இது நடந்த நிகழ்ச்சி.

கருவாய்… உருவாய்… வருவாய்… முருகா… “குருவாய்…” 

இந்த உபதேசத்தை அடிக்கடி படிப்பவர்களுக்கு இந்த உபதேசத்தின் வாயிலாக உருவான அந்த அணுக்களுக்கு அருள் ஞானிகளின் உணர்வுகள் உணவாகக் கிடைக்கும்.

பல நிலைகளில் பல கோணங்களிலும் அந்த உணர்வின் சத்தை உங்கள் உடலிலே விளைந்த அணுக்களுக்கு ஆகாரமாகக் கொடுப்பதற்குத்தான் உபதேசத்தை வழங்குகின்றோம்.

அதே சமயத்தில் புதிதாகப் படிப்பவர்களுக்கு அருள் ஞான வித்தாகப் ஊன்றப்படுகின்றது.

வித்தாக ஊன்றிய பின் இதை மீண்டும் நீங்கள் தொடர்ந்து நினைவுக்குக் கொண்டு வந்தால் அது கருவாகி உருவாகி அந்த அருள் ஞானத்தைப் பெறும் தகுதியைப் பெறுகின்றது.

சிலர் எண்ணிக் கொண்டிருக்கின்றார்கள் “ஒன்றும் புரியவில்லை…, அர்த்தமாகவில்லை…” என்று.

உங்களுக்கு அர்த்தமாகாது.
1.ஆனால் படிக்கும் உணர்வுகள் உங்களுக்குள் கருவாகும்
2.பின் அது உருவாகும்.
3.பின்பு இதனின் உணர்வுகள் உங்களுக்குள் தெளிவாகும்.

அது தான் “கருவாய்… உருவாய்… வருவாய்… முருகா – குருவாய்”.

நாம் எதனை எண்ணுகின்றோமோ அந்த உணர்வின் தன்மை
1.கருவாகி
2.உருவாகி
3.குருவாக வரும்.

இந்த ஆறாவது அறிவின் தன்மை (முருகா) கொண்டு நமக்குள் அது “தெளிவாக உருவாக்கும்… என்பது.

எப்படி ஒரு (ஒலி/ஓளி) நாடாவில் பதிவு செய்துவிட்டால் திருப்பி அதை மீண்டும் போட்டுப் பார்க்கும் பொழுது பதிவானதைக் கேட்கின்றோம்.

இதைப் போன்று தான் உபதேசிக்கும் உணர்வுகள் உங்களுக்குள் பதிவாகிவிடும். அணுவாக உருவாகிவிடும்.

அந்த அணுக்களுக்குச் சிறிது காலம் உணவைக் கொடுத்தால் அது மீண்டும் வளர்ச்சியாகித் “தன்னிச்சையாக” அதனின் உணவை எடுத்துக் கொண்டு வளர்ச்சி பெறும்.

முந்தைய நிலைகளில் உபதேசம் கேட்டவர்களுக்கு அதனால் விளைந்த அணுக்களுக்கு உயர்ந்த ஞான உணர்வாகக் கொடுக்கப்பட்டது. அதனின் வளர்ச்சி பெருக இது உதவும்.

அதே சமயத்தில் புதிதாகப் படிப்போர் உணர்வுகளில் ஊழ்வினை என்ற வித்தாக ஊன்றப்பட்டுள்ள நிலைகளில் அது கருவானதை உங்களுக்குள் உருவாக்க வேண்டும்.
1.உங்கள் நினைவினைக் கூட்டினால் அது உருவாகி
2.வளர்ச்சியின் தன்மை அடையும் பொழுது குருவாக வந்து
3.உங்களுக்கு நல் வழியும் காட்டும்.

அதை உணவாக ஏற்றுக் கொள்ளும் பக்குவமும் வரும். அப்பொழுது அந்த அருள் ஞானம் உங்களுக்குள் தன்னிச்சையாக வரும்.

யாம் சொல்வது புரியவில்லை என்று எண்ண வேண்டம்.

மாமகரிஷி ஈஸ்வராய குருதேவர் எமக்குள் எவ்வாறு ஆழப்பதிவு செய்து அந்த உணர்வின் அணுக்களைப் பெருக்கச் செய்து இந்தக் காற்று மண்டலத்திலுள்ள அருள் மகரிஷிகளின் அருள் உணர்வை நுகரச் செய்தாரோ அதை அப்படியே உங்களுக்குள்ளும் பெறச் செய்து கொண்டிருக்கின்றோம்.

உங்களை அறியாது வந்த தீமைகளிலிருந்து விடுபடும் நிலைக்கே இது உருவாக்கப்படுகின்றது. அந்த அருள் ஞானிகளின் உணர்வை நீங்கள் எடுத்து வலுப் பெற்றுக் கொள்ளுங்கள்.

விண்ணும் மண்ணும் போற்றக்கூடிய மெய்ஞானிகளாக வருவீர்கள். எமது அருளாசிகள்.

மகரிஷிகளுடன் நேரடியாகத் தொடர்பு கொள்ளச் செய்யும் தியானம் 

உங்கள் ஆசை எதில் இருக்க வேண்டும்…?

அந்த சப்தரிஷி மண்டலத்தின் பேரருள் பேரொளியை நாங்கள் பெறவேண்டும் அந்த சக்தி எங்களுக்குள் வளர வேண்டும் என்று ஆசைப்பட வேண்டும்.

1.யாரவது கஷ்டப்படுகிறார்கள் என்று கேள்விப்பட்டால்
2.அவர்களுக்கு அந்த மகரிஷிகளின் அருள் சக்தி கிடைக்க வேண்டும்
3.அவர்கள் மகிழ்ந்து வாழ வேண்டும் என்ற இந்த உணர்வை நீங்கள் எடுத்து உங்களுக்குள் சமைத்து
4.அதில் நீங்கள் மகிழ்ச்சியைத் தெரிந்து கொள்ள ஆசைப்பட வேண்டும்
5.இதை நீங்கள் பெருக்க வேண்டும்

ஒருவர் உடலில் ஆவி செயல்படுகிறது என்றால் 4 பேர் சேர்ந்து கூட்டுத் தியானம் இருக்க வேண்டும். மகரிஷிகளின் அருள்சக்தி நாங்கள் பெறவேண்டும் என்று இந்த சக்தியைக் கூட்டிக்கொள்ள வேண்டும்.

மகரிஷிகளின் அருள்சக்தியைக் கூட்டிக்கொண்டபின் அவர் உடலில் உள்ள ஆன்மா மகரிஷிகளின் அருள்சக்தி பெறவேண்டும். அந்த ஆன்மா அவருக்கு ஒரு நல்லது செய்ய வேண்டும் என்று சொல்லவேண்டும்.

அவர்களையும் நீ இந்த மாதிரி ஆத்ம சுத்தி செய்யச் சொல்லி நீ சீக்கிரம் நன்றாகிப்போ என்று சொல்லவேண்டும் இதைப் போல் எடுத்தார்கள் என்றால் அவர்களுக்கு லாபம். இதைப் பெருக்கிப்பழக வேண்டும்

ஏனென்றால் நீங்கள் அந்தப் பேருண்மையைப் பார்க்கப் பார்க்க உங்களை அறியாமலேயே அந்த உணர்வலைகளுக்குள் சென்றவுடனே  சப்தரிஷி மண்டலத்துடன் உங்கள் உணர்வுகள் சுழல்வதைப்பார்க்கலாம்.

இந்தத் தொடர்புக்குள் அந்த உணர்வுகள் தன்னிச்சையாகவே அதை எடுக்கும்.

1.ஒரு அரசமரத்தின் வித்து பாழடைந்த இடத்தில் பட்டாலும்
2.நீர் இல்லையென்றாலும் காற்றில் இருப்பதை எடுத்து
3.விழுதுகளைப் பாய்ச்சி தன் சத்தை எடுத்து வளர்ந்துவிடும்.

அதைப் போல உங்கள் நினைவின் ஆற்றல் எல்லாம் விண்ணுக்குச் சென்று பழக வேண்டும். அப்படிப் போனால் பல அற்புதங்கள் தெரியும். பல அதிசயங்கள் தெரியும்.

ஆரம்பத்தில் (30 வருடங்களுக்கு முன்) உங்களுக்கு என்ன காட்சி கிடைத்தது? உங்களுக்கு என்ன தெரிந்தது? என்று நான் கேட்பேன்.

அப்பொழுது எல்லாருக்கும் காட்சிகள் தெரியும். எல்லோரும் “அதைப் பார்த்தேன்… இதைப் பார்த்தேன்…” என்று சொல்வார்கள்

அப்படிச் சொன்னவர்களுக்கெல்லாம் என்ன ஆகியது? அந்த ஆசையில்தான் மூழ்கிவிட்டார்கள். அதிலிருந்து மீள்வதற்கு வழி இல்லாமல் போய்விட்டது

1அகண்ட பேரண்டக் காட்சியை நாம் அந்த மகரிஷிகளின் உணர்வுகளோடு பார்க்கவேண்டும்
2.அந்த மகரிஷிகளின் உணர்வைப் பெறவேண்டும் என்ற ஆசையை நாம் அங்கே வைக்கவேண்டும்
3.அதை நாம் வளர்க்கப் பழகவேண்டும்

ஏனென்றால் அதை நாம் எதில் பார்க்கவேண்டும் என்றால் அந்த மகரிஷிகளின் அருள்சக்தி பெறவேண்டும் என்று இதை நம் உடலுக்குள் ஏற்ற வேண்டும்.

இதன்வழி கொண்டு ஏற்றியபின் உங்கள் பார்வையால் யார் கஷ்டப்பட்டாலும் மகரிஷிகளின் அருள்சக்தி அவர்கள் பெறவேண்டும் அவர்கள் உடலில் உள்ள தீமைகள் எல்லாம் நீங்கவேண்டும் என்று “இந்தச் சக்தியை வைத்து… அந்த உண்மையான சக்தியை” நீங்கள்  பார்க்கலாம்.

இதைப் பார்க்கப்படும்போது அந்த தீமைகள் விலகி மகிழ்ச்சியின் உணர்வுகள் உங்களுக்குள் வரும். அந்த உணர்வின் எண்ணம் வேகமாகக் கொண்டு போகின்றது.

இதன் ரூபத்தில்தான் நீங்கள் பார்க்க வேண்டுமே தவிர எனக்குச் சப்தரிஷி மண்டலம் தெரியவில்லையே அது எப்படி வருகிறது? அது எப்படி இருக்குமோ…! என்று இந்த சந்தேகம் கூடாது.

படிப்படியாகத்தான் நாம் போக வேண்டும்.

ஒரு சினிமா காட்டுகின்றார்கள் என்றால்
1.அங்கே இருக்கும் போது ஒளியாகத்தான் படுகின்றது
2.அதைத் தடுத்து நிறுத்தும் போதுதான் உருவம் தெரிகின்றது
3.நாம் குறுக்கே பார்க்கும் போது தெரிவதில்லை (ஒளி தான் தெரியும்)
4.அதிலே தடுத்து நிற்கும் போதுதான் (திரையில்) அந்த உணர்வு தெரிகின்றது

அதே மாதிரிதான் அந்த மகரிஷியின் அருள் உணர்வுகள் நமக்கு முதலில் தெரியாது. “ஒளியின் அணுக்களாகத்தான் தெரியும்”.

உணர்வின் தன்மை தனக்குள் அதை நிறுத்தி அதை வைக்கப்படும் போது உருவத்தின் தன்மை “யார்…யார்…!” என்ற உணர்வுகள் நமக்குத் தெரிகின்றது

இவையெல்லாம் மாமகரிஷி ஈஸ்வராய குருதேவர் எனக்கு நேரடியாகக் காட்டிய நிலைகள்.
1.நீங்களும் அந்த மகரிஷிகளைப் பார்க்கலாம்.
2.அவர்களுடன் தொடர்பும் கொள்ள முடியும்.

நீங்கள் செய்யும் தொழிலில் “நஷ்டம் வராமல் தடுக்க” என்ன செய்ய வேண்டும்?

சில வீடுகளில் “இப்படிப் பேசுகிறானே…, உருப்படுவானா..” என்று சொல்லிச் சொல்லி.., இவர்களே உருப்படாமால் பண்ணிக் கொள்வதைப் பார்க்கலாம்.

இந்த மாதிரிப் பேசுகிறவர்கள் உடல்களிலே நிறையச் சங்கடங்கள் வரும். குடும்பத்தில் சண்டை வரும். குழந்தைகளிடம் வெறுப்படைவார்கள். இவர்கள் எண்ணமே உதவி செய்வதற்கு மாறாகப் பிரித்துவிட்டுவிடும்.

நண்பர்களிடமும் இதே போன்ற உணர்வுகளைத் தோன்றச் செய்து, பிரித்துவிடும். எப்பொழுது பார்த்தாலும் இதேபோல “உருப்படுவானா?” என்று சொல்வதைக் கேட்டு,நண்பர்களுக்கும் இவன் உருப்படுவானா? என்ற எண்ணத்தைத் தோற்றுவித்துவிடும்.

ஆக அவர் இவ்வாறு காரம் என்ற நிலைகளை எடுத்தால் நோய் என்ற நிலைகள் விளைகின்றது. அதனை நாம் எடுத்தால் நமக்குள்ளும் அதே நிலையாக மாற்றும். ஆகையினால் நம்மைப் பாதுகாத்துக் கொள்ள வேண்டுமென்றால்,நமக்குப் பாதுகாப்பு தேவை.

ஒவ்வொரு நொடியிலும் அந்த துருவ நட்சத்திரத்தின் பேரருளும் பேரொளியும் பெற வேண்டும் என்று இதை எடுத்து வளர்த்துக் கொண்டால் இதன் வழி நமக்கு இந்த உண்மையின் நிலைகள் வரும்.

நாம் தொழிலுக்குச் செல்லும் பொழுது இதே மாதிரி ஆத்ம சுத்தி செய்து விட்டு
1.நம்மிடம் வேலை செய்பவர்கள் அனைவரும் மகரிஷிகளின் அருள் சக்தி பெறவேண்டும்
2.பொருளறிந்து செயல்படும் சக்தி பெறவேண்டும்.
3.தொழிலில் நல்ல நாட்டம் வரவேண்டும்,
4.தெளிவான மனம் பெறவேண்டும்,
5.தெளிவாகத் தொழில் செய்யும் அந்த எண்ணம் வரவேண்டும், என்று
6.உங்கள் இடத்திலே உட்கார்ந்து “ஒரு பார்வை…” பார்க்க வேண்டும்.

நீங்கள் எதை எண்ணுகிறீர்களோ அதே போன்று நன்றாக இருக்க வேண்டும் என்று எண்ண வேண்டும்.

யாராவது தவறு செய்கிறார்கள் என்றால் இயற்கையில் அவர்களது குடும்பத்தில் எத்தனையோ விதமான நிலைகள் இருக்கும். பொருளாதாரத்தில் குறை இருக்கலாம். சொந்தத்திற்குள் யாராவது குறையாகப் பேசியிருக்கலாம்.

இந்த மாதிரி குறைகளைப் பேசி அவர்களுக்குள் வெறுப்பான நிலைகள் இருந்தால் நம்மிடம் வேலை பார்க்கும் பொழுது சிந்தனையிழந்து வேலை செய்யும் நிலை வரும்.

அப்பொழுது நம் பொருள்களுக்கு நஷ்டம் வரும்.

அவ்வாறு வராதபடி செய்ய வேண்டுமென்றால்… நாம் அவருக்கு அருள் உணர்வுகளைப் பாய்ச்சி, மகரிஷிகளின் அருள் சக்தியால் “நீ நன்றாக வேலை செய்ய வேண்டும்”, மகரிஷிகளின் அருள் சக்தியால், “நல்ல முறையில் உடல் ஆரோக்கியத்துடனும் சிந்திக்கும் சக்தியும் பெற்று நலமாக இருப்பாய்” என்று சொல்லி அனுப்ப வேண்டும்.

இதைப் போல, நாம் எடுத்துக் கொண்ட உணர்வுகள் தினம்  தினம் அவருக்குச் சொல்ல சொல்ல அவர் காதிலே கேட்கக் கேட்க – தினமும் வேலைக்கு வந்தவுடன் அவரிடம் சொல்லிவிட வேண்டும் – நாம் பதிவாக்கும் நல்ல உணர்வுகள் அங்கே இயங்கத் தொடங்கும்.

“மகரிஷிகள் அருள் சக்தியால் நீ நன்றாக இருப்பாய். தொழிலில் சிறந்து விளங்க வேண்டும்” என்று வாக்குகள் கொடுத்து இதே போன்று செய்யச் சொல்லிவிடுங்கள்.

சில வெறுப்பான நிலைகளோ சிந்தனையிழக்கும் நிலைகளோ அதிகம் இருந்தால் விபூதியையோ அல்லது ஒரு பொருளை எடுத்துக் கையில் கொடுத்து இதே போல சொல்லச் சொல்லி வேலை செய்யச் சொல்லுங்கள்.

இவ்வாறு செய்யச் சொன்னீர்கள் என்றால் தொழில் நன்றாக இருக்கும்.

மேலும் “எங்கள் வாடிக்கையாளர்கள் அனைவரும் மகரிஷிகளின் அருள் சக்தியால், நன்றாக இருக்க வேண்டும் என்று எண்ணும் பழக்கத்திற்குக் கொண்டு வர வேண்டும்.

1.சில சமயம் இதெல்லாம் மீறி
2.நமது தொழிலில் சில குறைபாடுகளைக் கண்டால்
3.அந்தக் குறை நம்மை இயக்கிவிடக்கூடாது.

அந்தக் குறை உணர்வு வந்தவுடன் நமக்குக் கோபம் வரும் அல்லது வேதனைப்படுகின்றோம். நாம் இதை நுகர்ந்தவுடனே நமது உயிர் இந்த உணர்வை உணர்ச்சியால் உடல் முழுவதும் பரப்புகின்றது. நமது இரத்தநாளங்களில் கலக்கின்றது.

அப்பொழுது என்ன செய்கின்றது?

நமது உடலில் உள்ள நல்ல அணுக்களில் விஷத்தன்மை போன உடனே
1.அதை ஏற்க மறுக்கும்.
2.நாம் தைரியமாகச் செய்யக் கூடிய எண்ணங்களும் பலவீனமடையும்.

ஆகையினால் அவ்வாறு விடாதபடி அடுத்த நிமிடம் “ஈஸ்வரா..” என்று சொல்லி புருவ மத்தியில் உங்கள் உயிரை எண்ணி அந்தத் துருவ நட்சத்திரத்தின் பேரருளும் பேரொளியும் நாங்கள் பெறவேண்டும் எங்கள் உடல் முழுவதும் படர வேண்டும் எங்கள் இரத்தநாளங்களில் படரவேண்டும் என்று இரண்டு நிமிடம் எடுத்துக் கொள்ள வேண்டும்.

பின் (தவறாக வேலை செய்பவர்) அவர் பொருளறிந்து செயல்படும் சக்தி பெறவேண்டும். அவர் தெளிவான மனம் பெறவேண்டும். தொழிலில் சிந்தித்துச் செயல்படும் அந்தச் சக்தி பெறவேண்டும் என்று
1.நாம் இங்கே உருவாக்கிவிட வேண்டும்.
2.அப்பொழுது அவரின் உணர்வு நமக்குள் சிறுத்துவிடுகின்றது.

பின் அவரைக் கூப்பிட்டு…, இனிமேல் “பார்த்துச் செய்வீர்கள்… சிந்தனையுடன் செய்வீர்கள்… நன்றாக நீங்கள் செயல்படுவீர்கள்…” என்று சொல்லிவிடுங்கள்.

இதனை ஒரு பழக்கத்திற்குக் கொண்டுவரவேண்டும்.

ஏனென்றால் அவர் குடும்பத்தில் இருக்கும் சிக்கலால் அவர் அறியாமல் செயல்படும் பொழுது அவர் உணர்வை நாம் நுகர்ந்தோம் என்றால் நமது உடலிலும் கலக்கின்றது.

சேற்றில் விழுந்து வருபவர்களைக் கட்டித் தழுவினால் எப்படி இருக்கும்…!

நம் உடலிலும் சேறாகிவிடும்.

ஆகையினால் அந்தச் சேற்றை நீக்கக் கூடிய அளவிற்கு நம் உடலில் ஒட்டிவிடாதபடி அதனைச் செயல்படுத்த வேண்டும். தொழிலில் இது ஒரு பழக்கத்திற்கு வர வேண்டும்.

இவ்வாறு ஒவ்வொரு நிமிடமும் அந்த துருவ நட்சத்திரத்தை எண்ணும் பொழுது ஒவ்வொரு கெட்ட குணத்திலேயும் அதை அடக்கக்கூடிய சக்தியாக…, “நமது எண்ணம்…” வருகிறது.

அந்தத் துருவ நட்சத்திரத்தின் உணர்வுகள் நம் உயிரில் பட்டவுடன், இது கலந்து
1.அவர் நல்ல குணம் வளரவேண்டும் என்கின்ற பொழுது
2.இதையே நமது உயிர் நல்ல அணுக்களாக “நமது உடலில்” மாற்றுகின்றது.

இந்த வாழ்க்கையில் எத்தகைய தீமையின் நிலை வந்தாலும் நமது உடலில் உள்ள நல்ல அணுக்கள் அனைத்திலுமே அந்த உணர்வு அனைத்தையும் சேர்த்து நல்லதாக மாற்றிக் கொள்ளும் பழக்கத்திற்கு வர வேண்டும்.

மிளகாய் தனியாகக் காரமாக இருந்தாலும் குழம்பில் போட்டவுடன் ருசியாகிவிடுகின்றது. உப்பு தனியாகக் கரித்தாலும் குழம்புடன் சேர்க்கப்படும் பொழுது தணிந்து விடுகின்றது.

இதே போல நாம் தொழில் செய்யும் இடங்களில் பலவிதமான நிலைகள் இருந்தாலும் நாம் இது போன்று செய்து பழக வேண்டும். தொழிலில் இது ஒரு பழக்கத்திற்கு வரவேண்டும்.

துரத்தி வரும் நாயைக் கண்டு பயப்படுகின்றோம்…! – மன வலிமை கொண்டு அதைத் தடுத்து நிறுத்தும் வழிமுறை 

குருநாதர் எம்மைக் காட்டுப் பகுதியில் அழைத்துச் சென்றார்.

நாம் சும்மா இருந்தாலும் மிருகங்கள் நம்மைத் தாக்க வரும். தாக்க வரப்படும்போது அதனின் வலிமையைக் கண்டு நீ அஞ்சிவிட்டால் அஞ்சிடும் உணர்வின் வலிமை உனக்குள் வந்துவிடுகின்றது என்றார் குருநாதர்.

ஆனால் அச்ச உணர்வுகள் வந்தபின் உன் நல்ல குணங்களும் உன்னைப் பாதுகாக்கும் குணங்களும் எங்கேங்கேயோ போய் விடுகின்றது.

ஆனால் அதே சமயத்தில் அச்ச உணர்வுகள் உனக்குள் வலிமையாகி விடுகின்றது. அந்த வலிமையுடன் நீ எதைச் சேர்க்க வேண்டும்?

மகரிஷிகளின் அருள் உணர்வு பெறவேண்டும் ஈஸ்வரா என்று ஏங்கி அந்த மகரிஷிகளின் அருள் உணர்வுகள் எங்கள் உடல் முழுவதும் படரவேண்டும் என்று சேர்த்துக் கொள்ள வேண்டும்.

1.அந்த மகரிஷிகளின் உணர்வு கொண்டு
2.இதே நிலைகள் கொண்டு சாந்த உணர்வாக
3.அந்த நட்பின் தன்மையாக நீ எண்ணி – அதைப் பார்.
4.அப்பொழுது அந்த உணர்வுகள் உடனே தணியும்.

அஞ்சிடும் உணர்வை நீ எடுத்துக் கொண்டால் நம்மை எதாவது செய்வான் என்று அந்த மிருகங்கள் நிச்சயம் உன்னைத் தாக்கும்.

உதாரணமாக, ஒரு நாய் துரத்துகிறது என்று வைத்துகொள்வோம்.

1.நீங்கள் அஞ்சிப் பாருங்கள்…, உடனே துரத்தி வரும்.
2.ஆனால் அந்த வலிமைமிக்க நிலைகளை எண்ணிக் கொஞ்சம் நிமிர்ந்து பாருங்கள்.
3.குரைத்துப் பக்கத்தில் வராது… அப்படியே நிற்கும். இதைப் பார்க்கலாம்.

நினைவின் ஆற்றல் நீங்கள் பயந்து போகும்போது பாருங்கள். நீங்கள் நாயைப் பார்த்தால் கண்களின் ஒரு விதமான ஒளி வரும்.

கண்களைப் பார்க்கும்போது தாக்கும் உணர்வு வரப்படும்போது நீங்கள் பயந்தால் போதும்.
1.அதன் உணர்வை வலிமையாக்கி “உர்ர்ர்…” என்று நிற்கும்.
2.அதனுடைய பார்வையே நம்மைப் பயமாக்கும்.

அதே சமயத்தில் மகரிஷிகளின் அருள்சக்தி பெற வேண்டும் என்ற உணர்வைச் சேர்த்து அதற்குச் சாந்த உணர்வு வர வேண்டும் என்று எண்ணிப் பாருங்கள். அது கண்கள் மங்கும்.

இதை உங்கள் அனுபவத்தில் பார்க்கலாம்.

ஏனென்றால் நாயாகவும் மற்ற உயிரினங்களாகவும் இருந்துதான் நாம் இன்று மனிதனாக வந்திருக்கின்றோம். இதைத்தான் இந்த நிலையில் நீ விழித்திரு என்ற நிலைகளில் எந்த அச்சுறுத்தும் உணர்வுகள் வருகின்றதோ அந்தத் தருணங்களிலெல்லாம் இதை நீ பாய்ச்சிப் பழகு.

அதனால்தான் ஒவ்வொரு நொடிகளிலும் நீ விழித்திரு என்றும் பல கோடிச் சரீரங்களிலும் தீமையைக் கண்டுணர்ந்து தீமையிலிருந்து விடுபடும் உணர்வை வளர்த்து வளர்த்து மனிதன் ஆனோம்.

ஆகவே தீமையைக் கண்டு கொள்ளும் அந்த உணர்வின் சக்தி மனிதனுக்கு உண்டு. ஆகையினால் கார்த்திகேயா.

ஆனால் அதே சமயத்தில் தெரிந்து கொண்டபின் தீமையை அடக்கும் சக்தி மனிதனுக்கு உண்டு என்ற நிலையை உருவாக்குகின்றார் குருநாதர்.

இதையெல்லாம் அனுபவ ரீதியில் தெரிந்து கொள்வதற்காகத்தான் காட்டுப் பகுதியில் என்னை அழைத்துச் சென்று அதிலிருந்து நீ எப்படித் தப்புவது? நீ எப்படித் தப்ப வேண்டும்? அந்த உணர்வின் இயக்கங்கள் உன் உடலுக்குள் என்ன செய்கின்றது? என்று அனுபவபூர்வமாகக் காட்டினார் குருநாதர்.

குருநாதர் உணர்த்திய வழியில் தான் உங்களுக்குள் “தீமையை நீக்கும் ஆற்றலை” உணர்த்திக் கொண்டு வருகின்றோம்.